Аграрлық несие корпорациясы экологиялық жоба аясында «Gold» белгісі мәртебесіне ие болды

Smart Plastic Zone экологиялық жобасы аясында «Аграрлық несие корпорациясы» АҚ пластикті тұрақты пайдалану практикасын енгізгені және экологиялық жауапкершілікті дамытуға қосқан үлесі үшін «Gold» белгісі мәртебесіне ие болды.

Gold белгісін алу Аграрлық несие корпорациясының тұрақты тұтыну қағидаттарына жүйелі көзқарасын және күнделікті кеңсе қызметінде экологиялық әсерді төмендетуін растайды. Корпорация кеңсесінде пластикпен жауапты жұмыс істеу жөніндегі шаралар кешені іске асырылды: пластикке баса назар аудара отырып, қалдықтарды бөлек жинау аймақтары ұйымдастырылды, қайта пайдалануға болатын шешімдерге және неғұрлым экологиялық баламаларға көшу есебінен бір реттік пластикалық ыдыс-аяқ пен қаптаманы пайдалану қысқартылды.

Аграрлық несие корпорациясының Smart Plastic Zone тәжірибесін енгізуі ESG тәсілінің бөлігі және экологиялық мәселелерді азайтып, қоғамдағы жауапты тәжірибелердің дамуын қолдай отырып, жайлы және тиімді жұмыс ортасын құруға деген ұмтылысын көрсетеді. Алдағы уақытта Корпорация «Жасыл» кеңсе бастамаларын дамыту жұмыстарын жалғастыруды, бөлек жинау тәжірибесін кеңейтуді және қызметкерлердің экологиялық жобаларға тартылуын арттыруды жоспарлап отыр.