Ауыл шаруашылығы министрлігінің бастамасын қолдаған «Аграрлық несие корпорациясы» АҚ Маңғыстау облысындағы мұқтаж шаруалар мен жеке қосалқы шаруашылықтарға бір күндік табысын аударды.

Жаздың басында ауа райына және тиімсіз болжамға байланысты Маңғыстау және Қызылорда облыстарында ерекше күрделі жағдай қалыптасты. Бір ғана Маңғыстау облысында ресми мәлімет бойынша өлген мал саны үш мыңға жеткен. ҚР Ауыл шаруашылығы министрінің міндетін атқарушы Ербол Қарашөкеевтің айтуынша, бүгінде жағдай тұрақталып, жем-шөп дайындау, зардап шеккендерге көмек көрсету бойынша ауқымды жұмыстар жүргізілуде.

Аграрлық несие корпорациясынан несие алған құрғақшылық пен жемшөп тапшылығынан зардап шеккен өңірлердің шаруалары келесі құжаттар пакетін ұсыну арқылы төлемдерді кейінге қалдыруға өтініш бере алады:

несиені ұзарту/қайта құрылымдау туралы өтініштер;

• Форс-мажорлық мән-жайлардың туындауын растайтын уәкілетті мемлекеттік органдардың жазбаша актілері немесе өзге де құжаттары. Әрбір өтініш мүмкіндігінше жылдам қаралады.
• Бүгінгі күні 10 шаруа қожалықтары төлемдерді кейінге қалдыруға өтініш білдірсе, оның алтауының өтініші бүгінге дейін мақұлданды.