АКК «Кең дала 2» бағдарламасы аясында қаржыландыру үшін 52 кредиттік серіктестікті аккредиттеді
Аккредиттелген кредиттік серіктестіктер 2026 жылы жалпы сомасы 95 млрд теңгеге дейін көтерме қаржыландыруға қол жеткізеді.
Аграрлық кредиттік корпорация «Кең дала 2» жеңілдетілген қаржыландыру бағдарламасына қатысу үшін кредиттік серіктестіктерді (КС) аккредиттеудің кезекті кезеңін аяқтады.
Қаржылық тұрақтылықты, кредиттік портфельді және АКК талаптарына сәйкестікті тексеру қорытындысы бойынша Қазақстанның 14 өңіріндегі 52 кредиттік серіктестік аккредиттелген серіктес мәртебесін алды.
Аккредиттелген КС түпкілікті қарыз алушылар үшін жылдық 5%-дан аспайтын сыйақы мөлшерлемесімен АКК-ның көтерме қаржыландыруын тарта алады. 2026 жылға арналған қаржыландырудың жалпы лимиті 95 млрд теңгеге дейін болады.
Аккредиттелген кредиттік серіктестіктердің тізімі agrocredit.kz сайтының «Серіктестер» бөлімінде жарияланған.